[主頁] [睇樓] [家事百科] [羅力威] [蘇GOOD] [化妝美容] [中英文兒歌] [產前產後] [奶奶趣聞] [Flashcards] [開心大發現] [食譜] [馬爾代夫] [旅遊飲食] [必睇] [最新]
[產前產後] [生活] [惡搞] [兩岸國際] [親子] [時事專輯] [時事] [娛樂節目] [娛樂] [食譜] [兒歌] [網熱]

[娛樂] 宮心計發達宴賀收視長勝



[蘋果日報] 上屆視后米雪今年憑台慶劇《宮心計》中的「鍾司制」鍾雪霞一角,獲提名最佳女配角,有份提名固然開心,但最令她興奮的,莫過於觀眾對劇集反應熱烈。由太皇太后以至宮女,劇中個個爭權爭寵,觀眾邊睇邊肉緊,難怪米雪笑說:「證明啲人心地唔好,鬧得越勁越開心,但亦即係話有戲味先會吸引觀眾。」 撰文:何慧斯

記得《宮心計》首播當日,無綫安排眾演員在商場與過百名觀眾齊齊睇首播,現場觀眾見到米雪飾演的鍾雪霞對關菊英飾演的阮翠雲咄咄相逼,個個都睇得肉緊,米雪日前笑說:「嗰晚已經有人話估唔到第一集已經有鬧交戲,反應好梗係開心,今次收視比《家好月圓》仲高,聽講好耐冇試過喺八點半呢個時段有咁高收視,證明啲人心地唔好,鬧得越勁越開心,但亦即係話有戲味先會吸引觀眾。」

跟蔣志光有默契
與關菊英鬥氣鬥嘴固然令人一追再追,然而米雪最愛的是與布公公(蔣志光飾)一段似有還無的感情,她說:「我好鍾意同蔣志光呢段感情線,好新鮮,就算菊姐同 KK(張國強)嘅感情線都係見唔到,淨係話佢哋多年後重逢, KK已經有太太,大家只係講舊情。後宮咁多宮女淨係得我有,我哋會不經意咁拖拉手,佢對我嗰種又怕醜又鍾意嘅感情,緩和吓爭名逐利嘅後宮生活,好特別又得意。」
米雪續說:「嗰陣宮女係終身都唔能夠出宮同出嫁,所以皇帝會賜一個太監『對食』,即係話喺宮中有個伴,陪食陪傾偈,好似知己咁。我哋嘅關係好微妙,一直都知布公公鍾意我,但我初初未搞清楚自己嘅感覺,淨係當佢係出氣袋,直到佢俾人害死,先知道自己原來好鍾意佢。」米雪更大讚光仔:「雖然我哋第一次合作,但一埋位就好有默契,我都好想再同光仔合作,佢真係做得好好。」

大嘆好劇本難求
屈指一算,米雪已經是第三度與菊姐合作,對於今次再碰頭,米雪說:「我哋真係好有默契,隨時加對手戲都冇問題,好多時仲會留番啲位畀大家發揮,有時只係望一望,已經知道大家嘅諗法。我唔止好佩服菊姐,仲好佩服後生嘅演員,佢哋好多都係講英文,初初都擔心劇本太難,點知埋位後發覺又得喎。」
一直以來,米雪自覺很幸運,經常遇到好劇本和好角色。問她喜歡《家好月圓》的大奸角紅姨抑或《宮心計》的鍾雪霞?她說:「呢啲由觀眾決定,我覺得兩部戲都好唔同,上次為男人,今次為爭權爭寵,我好耐冇拍古裝,又好耐冇試過拍女人戲。」
米雪續說:「家真係好劇本難求,過咗就冇,接戲前已經覺得好好玩,靚人靚景同靚衫,我畀咗好多心機落去。交功課之餘,我都好享受過程,娛人娛己的確好過癮,我咁多年拍戲唔係計錢,淨係會問監製有幾多集戲,好唔好玩?喺無綫拍劇係享受拍戲,享受同呢班演員再合作,就算幾辛苦都值得。」

發達宴賀收視長勝
無綫台慶劇《宮心計》有收視有口碑,一班主要演員輪住請吃飯,米雪前晚在銅鑼灣筵開 8席宴請台前幕後,除了楊怡和鄭嘉穎因為工作而缺席外,佘詩曼、陳豪和關菊英等均有出席。阿佘表示下次會與陳豪、鄭嘉穎和楊怡四人夾錢請食大餐。

陳豪增肥

對於《宮》劇結局被披露,米雪笑指實際劇情沒人知道。菊姐就覺得不會影響收視,但卻覺得未必能突破《大長今》成績。阿佘則說:「係唔係真都好,觀眾都會睇,睇咗先知係咪真。」
陳豪被問到緋聞女友廖碧兒日前指他太瘦不好攬,他甜笑說:「完咗會放鬆啲,增肥番少少。」
採訪:卓寶花
攝影:黃偉雄

No comments: