[主頁] [睇樓] [家事百科] [羅力威] [蘇GOOD] [化妝美容] [中英文兒歌] [產前產後] [奶奶趣聞] [Flashcards] [開心大發現] [食譜] [馬爾代夫] [旅遊飲食] [必睇] [最新]
[產前產後] [生活] [惡搞] [兩岸國際] [親子] [時事專輯] [時事] [娛樂節目] [娛樂] [食譜] [兒歌] [網熱]

[政治] 白姐姐誓要入立會接蕉

嫌謝偉俊議事堂內表現懦弱 白姐姐誓入立會接蕉


言行素來出位嘅白韻琴,噚日忽然召開記者會,話社民連宣佈總辭之日,亦係佢去馬參加補選之時,無論毓民去邊區選,佢都奉陪到底,誓要追擊癲狗咁話喎。
人稱才女嘅白姐姐噚日一身白雪 look亮相,表示睇唔過眼毓民、長毛所作所為,不齒兩人越來越癲,喺議事堂入面掟蕉、爆粗都未夠,近日仲變本加厲逼其他泛民議員總辭公投,白姐姐話,鋪鋪玩晒冷唔只教壞細路,仲有違追求民主嘅理想。
白姐姐男朋友「法律超人」謝偉俊已經係尊貴議員,不過白姐姐聲言決定參選與謝偉俊無關,形容自己參選對抗毓民係「匹婦有責」。佢又話由於同毓民好老友,所以預咗會俾佢鬧,仲謙稱辯才不及毓民,日後喺選舉論壇上實唔夠佢拗,但係為咗真理,點都要撐到底。
踩社民連只係識掟蕉

除咗睇唔過眼毓民、長毛,激發白姐姐參選嘅仲包括謝偉俊,白姐姐噚日好唔客氣咁指謝偉俊喺議事堂內表現太軟弱,見到有人掟蕉都唔制止,成何體統?佢話此風不可長,否則台灣、韓國國會動粗場面,連女議員個胸圍都扯埋出嚟呢啲兒童不宜情況喺立法會發生,就真係該煨。白姐姐揚言,假如佢當選,絕對唔會再容許任何人再掟蕉!
反對掟蕉嘅白姐姐稱,社民連只係識掟蕉,根本係黔驢技盡,遲早做騷都冇人睇,笑言毓民等人應該學吓師奶劇集《宮心計》咁,有啲新橋先有人追看。至於佢嘅橋,即係政綱,就係取消喺添馬艦興建新政府總部,將黃金地皮拍賣,還地於民兼有益庫房。
稱獲得唔少師奶支持

八方唔知呢個政綱有幾多人支持,白姐姐則話近日出席紀念已故名伶任劍輝活動,唔少師奶都話支持佢參選,所以對勝算信心十足。不過那邊廂謝偉俊知道白姐姐宣佈參選卻滴晒汗,話事前完全唔知道白姐姐要參選,指佢心口寫個勇字,佢都無話可說。
詹培忠已表態會辭職與社民連周旋,白姐姐加入如虎添翼,若然連巴士阿叔陳乙東都出場,社民連三子怕且驚到震囉。


No comments: