[主頁] [睇樓] [家事百科] [羅力威] [蘇GOOD] [化妝美容] [中英文兒歌] [產前產後] [奶奶趣聞] [Flashcards] [開心大發現] [食譜] [馬爾代夫] [旅遊飲食] [必睇] [最新]
[產前產後] [生活] [惡搞] [兩岸國際] [親子] [時事專輯] [時事] [娛樂節目] [娛樂] [食譜] [兒歌] [網熱]

[時事] Sorry Sir要周刊 say sorry



[轉載/蘋果日報]隔牆有耳: Sorry Sir要周刊 say sorry 2010年04月08日

一哥鄧竟成提早劈炮,引起無限聯想。噚日出版嘅最新一期《壹週刊》更爆出「驚人內幕」,封面報道一哥面對警隊排山倒海嘅醜聞,壓力爆錶,要去中環睇心理醫生。咁大件事?《無間道》梁朝偉就話三年又三年頂唔順要搵陳慧琳啫,一哥做咗三年咋喎,唔通處長真係惡撈過卧底咁多!
壹仔個古仔係咁講嘅:鄧竟成做咗一哥之後,醜聞接踵而來, Foxy洩密、人肉路障,連警員喺差館強姦女報案人都夠膽死。鑊鑊 sorry鑊鑊甘,仲搞到俾人改花名叫做 Sorry Sir,曾經係飛虎精英嘅一哥都頂唔順,尤其面對傳媒時驚再講錯嘢,壓力超大,舊年 8月之後開始去搵心理專家,高峯時一星期見兩次,學習釋懷同放開對傳媒嘅恐懼。
回應好玄被當間接承認

壹仔記者仲走去旺角警察遊樂會,搵去踢波嘅一哥當面求證。報道話一哥初時反問記者「你睇我,有冇需要睇醫生先?」記者話有人見過佢喺中環心理醫生醫務所出入喎,一哥就笑笑口咁話:「吓,咁我去探朋友得唔得呀?」答得咁玄,壹仔當佢間接承認。
報道出街後,警隊內部議論紛紛,連八方之類嘅平民百姓都好關注,因為一哥係特區主要官員,全港三萬名執法者之首,如果真係有乜心理問題或者情緒困擾,隨時牽涉大眾公眾利益。有資深警務人員話,按照警隊規例,如果警方臨床心理專家發現啲夥計出現危害自己或其他人性命嘅症狀,必須通知管方跟進。唔少警隊中人就話,其實一哥睇心理專家嘅傳聞都傳咗好耐,不過大家冇當真。
老細聲譽攸關,警察公共關係科總警司吳家聲即刻做嘢,下午臨放工時出咗封信畀壹仔,仲上載埋去警務處個官方網頁畀大家睇。吳家聲喺封信度話,一哥明年退休係正常安排,絕對同工作壓力無關,一哥更從-來-冇-向-任-何-心-理-醫-生-求-助。封信又話,壹仔嘅報道令人對一哥嘅健康情況產生憂慮,要求壹仔澄清,仲話一哥會「保留追究權利」喎。
如果 Sorry Sir一哥成功叫到壹仔 say sorry,咁佢臨退休前算唔算攞番啲彩呢?

No comments: